Қазақстан Республикасы Үкiметiнiң 2011 жылғы 17 ақпандағы № 143 Қаулысы
"Қазақстан Республикасы Президентiнiң 2002 жылғы 29 тамыздағы № 941 Жарлығына толықтырулар мен өзгерiс енгiзу туралы" Қазақстан Республикасының Президентi Жарлығының жобасы туралы

Қазақстан Республикасының Үкiметi ҚАУЛЫ ЕТЕДI:
«Қазақстан Республикасы Президентiнiң 2002 жылғы 29 тамыздағы № 941 Жарлығына толықтырулар мен өзгерiс енгiзу туралы» Қазақстан Республикасының Президентi Жарлығының жобасы Қазақстан Республикасы Президентiнiң қарауына енгiзiлсiн.

Қазақстан Республикасының
Премьер-Министрi К. Мәсiмов

Қазақстан Республикасы Президентiнiң Жарлығы

Қазақстан Республикасы Президентiнiң 2002 жылғы 29 тамыздағы
№ 941 Жарлығына толықтырулар мен өзгерiс енгiзу туралы

ҚАУЛЫ ЕТЕМIН:
1. «Дипломаттық дәрежелердi беру тәртiбi туралы ереженi бекiту туралы» Қазақстан Республикасы Президентiнiң 2002 жылғы 29 тамыздағы № 941 Жарлығына (Қазақстан Республикасының ПҮАЖ-ы, 2002 ж., № 28, 309-құжат) мынадай толықтырулар мен өзгерiс енгiзiлсiн:
жоғарыда аталған Жарлықпен бекiтiлген Дипломаттық дәрежелердi беру тәртiбi туралы ережеде:
3-тармақ мынадай мазмұндағы екiншi, үшiншi, төртiншi және бесiншi бөлiктермен толықтырылсын:
«Жоғарыда санамаланған дипломаттық дәрежелердi беруге ұсынысты Қазақстан Республикасының Сыртқы iстер министрi Қазақстан Республикасының Президентiне Қазақстан Республикасының сыртқы саясатын iске асыруға қатысу тиiмдiлiгiн және Қазақстан Республикасы Президентiнiң сыртқы саяси бастамаларын iске асыруға қатысу тиiмдiлiгiн ескере отырып енгiзедi.
Төтенше және Өкiлеттi Елшi дипломаттық дәрежесi Қазақстан Республикасының Төтенше және Өкiлеттi Елшiсi, Қазақстан Республикасының халықаралық ұйым жанындағы Тұрақты өкiлi лауазымында кемiнде екi жыл дипломатиялық қызмет стажы бар дипломатиялық қызмет қызметкерлерiне берiлуi мүмкiн.
I сыныпты Төтенше және Өкiлеттi Уәкiл дипломаттық дәрежесi Қазақстан Республикасының Сыртқы iстер министрi, Қазақстан Республикасының Төтенше және Өкiлеттi Елшiсi, Қазақстан Республикасының халықаралық ұйым жанындағы Тұрақты өкiлi, Қазақстан Республикасы Сыртқы iстер министрлiгiнiң жауапты хатшысы, Қазақстан Республикасы Сыртқы iстер министрiнiң орынбасары лауазымдарын атқаратын дипломатиялық қызмет қызметкерлерiне берiлуi мүмкiн.
II сыныпты Төтенше және Өкiлеттi Уәкiл дипломаттық дәрежесi Сыртқы iстер министрлiгiнiң комитет төрағасынан, ерекше тапсырмалар жөнiндегi елшiсiнен, департамент директорынан, Қазақстан Республикасының сенiмдi өкiлiнен, Қазақстан Республикасының бас консулынан төмен емес лауазымды атқаратын дипломатиялық қызмет қызметкерлерiне берiлуi мүмкiн.»;
10-тармақтағы «екiншi абзацында» деген сөздер «алтыншы бөлiгiнде» деген сөздермен ауыстырылсын.
2. Осы Жарлық 2011 жылғы 1 қаңтардан бастап қолданысқа енгiзiледi.

Қазақстан Республикасының
Президентi Н. Назарбаев

Астана, Ақорда, 2011 жылғы
№ _____