Қазақстан Республикасы Үкiметiнiң 2012 жылғы 29 наурыздағы № 365 Қаулысы
"Адвокаттық және нотариаттық қызмет түрлерiн лицензиялау кезiнде қойылатын бiлiктiлiк талаптарын бекiту туралы" Қазақстан Республикасы Үкiметiнiң 2007 жылғы 2 маусымдағы № 454 қаулысына өзгерiстер мен толықтырулар енгiзу туралы

Қазақстан Республикасының Үкiметi ҚАУЛЫ ЕТЕДI:
1. «Адвокаттық және нотариаттық қызмет түрлерiн лицензиялау кезiнде қойылатын бiлiктiлiк талаптарын бекiту туралы» Қазақстан Республикасы Үкiметiнiң 2007 жылғы 2 маусымдағы № 454 қаулысына (Қазақстан Республикасының ПҮАЖ-ы, 2007 ж., № 18, 204-құжат) мынадай өзгерiстер мен толықтырулар енгiзiлсiн:
1) көрсетiлген қаулымен бекiтiлген Адвокаттық қызметтi лицензиялау кезiнде қойылатын бiлiктiлiк талаптарында:
1-тармақтың 3) тармақшасы мынадай редакцияда жазылсын:
«3) кемiнде бес жыл адвокаттық қызмет стажы бар адвокатта алты айдан бiр жылға дейiнгi мерзiмде тағылымдамадан өту;»;
2, 3-тармақтар мынадай редакцияда жазылсын:
«2. Осы адвокаттық қызметтi лицензиялау кезiнде қойылатын бiлiктiлiк талаптарының 1-тармағының 3) тармақшасында көзделген бiлiктiлiк талабы «Қазақстан Республикасының сот жүйесi мен судьяларының мәртебесi туралы» Қазақстан Республикасы Конституциялық заңының 34-бабы 1-тармағының 1), 2), 3), 9) және 12) тармақшаларында көзделген негiздер бойынша судья өкiлеттiктерiн тоқтатқан адамдарға қолданылмайды.
«3. Осы адвокаттық қызметтi лицензиялау кезiнде қойылатын бiлiктiлiк талаптарының 1-тармағының 4) тармақшасында көзделген бiлiктiлiк талабы мыналарға:
1) Қазақстан Республикасының Жоғары Соты Кеңесiнiң жанындағы Бiлiктiлiк комиссиясында бiлiктiлiк емтиханын тапсырған, сотта тағылымдамадан ойдағыдай өткен және облыстық немесе оған теңестiрiлген соттың жалпы отырысының оң пiкiрiн алған адамдарға;
2) «Қазақстан Республикасының сот жүйесi мен судьяларының мәртебесi туралы» Қазақстан Республикасы Конституциялық заңының 34-бабы 1-тармағының 1), 2), 3), 9) және 12) тармақшаларында көзделген негiздер бойынша судья өкiлеттiктерiн тоқтатқан адамдарға;
3) терiс себептермен босатылғандарды қоспағанда, прокурор немесе тергеушi лауазымында кемiнде он жыл жұмыс өтiлi болған жағдайда, прокуратура және тергеу органдарынан босатылған адамдарға қолданылмайды.»;
2) көрсетiлген қаулымен бекiтiлген Нотариаттық қызметтi лицензиялау кезiнде қойылатын бiлiктiлiк талаптарында:
1-тармақта:
6) тармақша мынадай редакцияда жазылсын:
«6) соттылығының болмауы;»;
мынадай мазмұндағы 7) және 8) тармақшалармен толықтырылсын:
«7) жиырма бес жасқа толуы;
8) заң мамандығы бойынша кемiнде екi жыл жұмыс өтiлiнiң болуы.»;
2, 3-тармақтар мынадай редакцияда жазылсын:
«2. Осы нотариаттық қызметтi лицензиялау кезiнде қойылатын бiлiктiлiк талаптарының 1-тармағының 3) тармақшасында көзделген бiлiктiлiк талабы терiс себептермен қызметiнен босатылғандарды қоспағанда, мемлекеттiк нотариус болып қызмет атқарған жұмыс өтiлi бар адамдарға қолданылмайды.
«3. Осы нотариаттық қызметтi лицензиялау кезiнде қойылатын бiлiктiлiк талаптарының 1-тармағының 4) тармақшасында көзделген бiлiктiлiк талабы мыналарға:
1) Қазақстан Республикасының Әдiлет бiлiктiлiк алқасында немесе Қазақстан Республикасы Жоғарғы Соты Кеңесiнiң жанындағы Бiлiктiлiк комиссиясында бiлiктiлiк емтиханын тапсырған адамдар, тұрақты судьялар және өз мiндеттерiн орындау кезiнде терiс қылықтары мен заңдылықты бұзғаны үшiн судья лауазымынан босатылған судьяларды қоспағанда, тұрақты судья болып жұмыс iстеген адамдарға;
2) мемлекеттiк нотариустарға қолданылмайды.»;
2. Осы қаулы алғашқы ресми жарияланғанынан кейiн күнтiзбелiк жиырма бiр күн өткен соң қолданысқа енгiзiледi.