| Правила | |
 |
|
|
Қазақстан Республикасы Үкіметінің 2010 жылғы 30 қазандағы № 1141 қаулысымен бекітілген Қазақстан Республикасы халықаралық шарттарының орындалуын қамтамасыз ету мониторингі қағидасы 1. Жалпы ережелер 1. Осы Қазақстан Республикасы халықаралық шарттарының орындалуын қамтамасыз етуге мониторинг жүргізу қағидасы (бұдан әрі - Қағида) «Қазақстан Республикасының халықаралық шарттары туралы» Қазақстан Республикасының 2005 жылғы 30 мамырдағы Заңының 20-бабының 6-тармағына сәйкес әзірленді және Қазақстан Республикасының Президентіне тікелей бағынатын және есеп беретін Қазақстан Республикасы мемлекеттік органдарының, сондай-ақ Қазақстан Республикасы орталық атқарушы органдарының (бұдан әрі - орталық мемлекеттік органдар) міндеттемелерді міндетті және адал орындауын және күшіне енген Қазақстан Республикасының халықаралық шарттарынан туындайтын құқықтардың жүзеге асырылуын қамтамасыз ету мониторингі тәртібін анықтайды. 2. Қазақстан Республикасы халықаралық шарттарының орындалуын қамтамасыз етуге мониторинг бойынша мемлекеттік органдардың қызметін үйлестіруді құзыретіне халықаралық шарттардың орындалуын жалпы қадағалау мен бақылау жататын Қазақстан Республикасы Сыртқы істер министрлігі (бұдан әрі - уәкілетті орган) жүзеге асырады. 2. Халықаралық шарттарға мониторинг жүргізу 3. Мемлекеттік органдарда Қазақстан Республикасы халықаралық шарттарының орындалуын қамтамасыз етуге мониторингті (бұдан әрі - халықаралық шарттарға мониторинг) орталық мемлекеттік органның басшысы немесе жауапты хатшысы анықтайтын құрылымдық бөлімшелер (бұдан әрі - бөлімшелер) жүзеге асырады. 4. Халықаралық шарттарға мониторингті тиісті орталық мемлекеттік орган оларға қатысты осы орталық мемлекеттік органның құзыретіне жататын мәселелер бойынша жасасу туралы ұсыныс енгізген, сондай-ақ бұрын жасалған халықаралық шарттар бойынша тұрақты негізде бөлімшелер жүргізеді. 5. Орталық мемлекеттік органдар жыл сайын, 10 қарашадан кешіктірмей уәкілетті органға: 1) күшіне енген халықаралық шарттардың ағымдағы жыл ішінде орындалу барысы туралы; 2) Қазақстан Республикасы уағдаласушы тарапы болып табылатын қол қойылған және күшіне енбеген халықаралық шарттар бойынша мемлекетішілік рәсімдердің орындалу барысы туралы, оның ішінде олардың орындалмау себептері туралы ақпарат береді. Күшіне енген халықаралық шарттар туралы ақпарат: 1) халықаралық шарттардан туындайтын Қазақстан Республикасына тиесілі құқықтардың жүзеге асырылуын, сондай-ақ халықаралық шарттардың басқа қатысушыларының өз міндеттемелерін орындауын қадағалауды талдауды; 2) халықаралық шарттардың орындалуы барысында анықталған проблемалық мәселелерді шешу жөніндегі ұсыныстарды қамтуы тиіс. 6. Халықаралық шарттарға мониторинг жүргізген кезде орталық мемлекеттік органдар: 1) тиісті орталық мемлекеттік органның құзыретіне жататын мәселелерді реттейтін халықаралық шарттардың ережелерін; 2) халықаралық шарттардың реттеу мәніне байланысты Қазақстан Республикасының нормативтік құқықтық актілерін; 3) халықаралық шарттардан туындайтын Қазақстан Республикасының міндеттемелерін орындау мен құқықтарын жүзеге асыруды қамтамасыз ету туралы, сондай-ақ көрсетілген міндеттемелерді халықаралық шарттың басқа қатысушыларының орындауы туралы мәліметтерді (статистикалық мәліметтерді қоса алғанда); 4) халықаралық шарттарды орындауға қатысты бұқаралық ақпарат құралдарында және жалпыға қол жетімді телекоммуникациялық желілердегі интернет-ресурстарда жарияланымдарды; 5) бар болған жағдайда, халықаралық шарттардан туындайтын Қазақстан Республикасының міндеттемелерін орындау мен құқықтарын жүзеге асыруды қамтамасыз ету бойынша халықаралық ұйымдарда ұсынылған Қазақстан Республикасының мерзімдік баяндамаларын (есептерін); 6) халықаралық шарттардың, оның ішінде жоғарыда көрсетілген Қазақстан Республикасының мерзімді баяндамаларын қорғау қорытындылары бойынша дипломатиялық арналар арқылы алынғандардың орындалуын қамтамасыз ету бойынша халықаралық ұйымдардың, халықаралық сарапшылардың және үкіметтік емес ұйымдардың ұсынымдарын; 7) Қазақстан Республикасының Үкіметі мен Қазақстан Республикасының Президенті жанындағы халықаралық шарттардың орындалуын қамтамасыз ету жөніндегі консультациялық-кеңесші органдардың ұсынымдары мен ұсыныстарын талдайды. 7. Ақпарат электрондық және қағаз тасымалдағыштарда қазақ және орыс тілдерінде орталық мемлекеттік органның жауапты хатшысының қолымен, ал ол болмаған жағдайда орталық мемлекеттік орган басшысы орынбасарының қолымен уәкілетті органға беріледі. 3. Халықаралық шарттарға мониторингті үйлестіру 8. Уәкілетті орган орталық мемлекеттік органдар ұсынған ақпаратты қорытады, талдайды және талдау нәтижелері бойынша сыртқы саяси бағаны қамтитын жиынтық ақпаратты жылына бір рет 10 желтоқсаннан кешіктірмей Қазақстан Республикасы Премьер-Министрінің Кеңсесіне (бұдан әрі - Премьер-Министр Кеңсесі) жібереді. 9. Уәкілетті орган жиынтық ақпаратқа халықаралық ұйымдардың ұсынымдары болған жағдайда, олардың көшірмелерін қоса береді. 10. Премьер-Министр Кеңсесі жиынтық ақпаратты Қазақстан Республикасы Президентінің Јкімшілігіне Қазақстан Республикасы Президентінің 2010 жылғы 10 тамыздағы № 1037 Жарлығымен бекітілген Қазақстан Республикасының халықаралық шарттарының орындалуы туралы ақпаратты дайындау және оны Қазақстан Республикасы Президентінің қарауына енгізу, сондай-ақ Қазақстан Республикасы қатысушысы болып табылатын халықаралық ұйымдар шешімдерінің жобаларын келісу және оларды іске асыру, Қазақстан Республикасы Президентінің қатысуымен өтетін Қазақстан Республикасының халықаралық іс-шараларын дайындау және қол жеткізілген уағдаластықтарды орындау қағидаларында анықталған тәртіппен жібереді. 11. Уәкілетті орган жыл сайынғы талдау мен орталық мемлекеттік органдар жүргізетін халықаралық шарттарға мониторингтің қорытындыларын өз интернет-ресурсында жариялайды. 12. Осы Қағиданың 8 - 10-тармақтарын іске асыру электрондық құжат айналымының бірыңғай жүйесін пайдалана отырып, Қазақстан Республикасының заңнамасында белгіленген тәртіппен жүзеге асырылады. |
