Қазақстан Республикасының Әділет министрінің 2011 жылғы 20 қаңтардағы № 15 бұйрығы. Қазақстан Республикасының Әділет министрлігінде 2011 жылы 27 қаңтарда № 6754 тіркелді
Жеке сот орындаушысымен ағымдағы шоттағы сомаларды есепке алу кітабын (депозиттік кітап) жүргізу ережесін бекіту туралы

Қазақстан Республикасы
Әдiлет министрiнiң
2011 жылғы 20 қаңтардағы № 15
бұйрығымен бекiтiлген

Жеке сот орындаушысымен ағымдағы шоттағы сомаларды есепке алу
кiтабын (депозиттiк кiтап) жүргiзу ережесi

1. Осы Ереже «Атқарушылық iс жүргiзу және сот орындаушыларының мәртебесi туралы» 2010 жылғы 2 сәуiрдегi Қазақстан Республикасы Заңы123-бабының 2-тармағына сәйкес әзiрленген және жеке сот орындаушысымен ағымдағы шоттағы сомаларды есепке алу кiтабын (депозиттiк кiтап) жүргiзу тәртiбiн реттейдi.
2. Ағымдағы шоттағы сомаларды есепке алу мақсатында жеке сот орындаушысымен ағымдағы шоттағы сомаларды есепке алу кiтабы (бұдан әрi - депозиттiк кiтап) жүргiзiледi.
3. Депозиттiк кiтап нөмiрленедi, тiгiледi, жеке сот орындаушысының қолы қойылып, мөрiмен куәландырылады.
4. Депозиттiк кiтапта: ағымдағы шотқа ақша сомасы түскен күнi, атқарушылық iс жүргiзу нөмiрi, егер борышкер бiрнеше атқарушылық iс жүргiзу бойынша сома аударса, онда барлық атқарушылық iс жүргiзудiң нөмiрлерi көрсетiледi; төлем құжатының атауы мен нөмiрi; борышкердiң деректерi (жеке тұлғаның тегi, аты, әкесiнiң аты немесе заңды тұлғаның атауы), сондай-ақ борышкер үшiн сома аударған адамның деректерi (жеке тұлғаның тегi, аты, әкесiнiң аты немесе заңды тұлғаның атауы); өндiрiп алушының деректерi (жеке тұлғаның тегi, аты, әкесiнiң аты немесе заңды тұлғаның атауы), сондай-ақ өндiрiп алушы өкiлiнiң деректерi; түскен соманың мөлшерi; төлем құжатының нөмiрi мен күнi, өндiрiп алушыға соманы төлейтiн күн; төленген соманың мөлшерi, егер өндiрiп алушылар бiрнеше болса, әрбiр өндiрiп алушыға төленген сома көрсетiледi, алушының деректерi (жеке тұлғаның тегi, аты, әкесiнiң аты немесе заңды тұлғаның атауы); төленбеген соманың қалдығы көрсетiледi.
5. Депозиттiк кiтапты ашу кезiнде оған жеке сот орындаушысының сол күнгi банктегi ағымдағы шотында бар қалдық сома түгелдей енгiзiледi. Кейiннен банктен үзiндiлердiң келiп түсуiне қарай жазба жүргiзiледi.
6. Жеке сот орындаушысының ағымдағы шотынан соманы аудару туралы өтiнiшiн алу кезiнде, жеке сот орындаушысы ақшалай қаражатты аударуға арналған үш данада төлем шотын ресiмдейдi.
Аталған төлем шотының орындалуы туралы банктiң белгiлеуiнен кейiн жеке сот орындаушысы депозиттiк кiтапта тиiстi жазба жүргiзедi. Төлем шотының бiр данасы атқарушылық iс жүргiзу материалдарына тiркеледi, екiншiсi хронологиялық тәртiпте нарядқа жеке тiгiледi. Атқарушылық құжат бойынша тиесiлi соманы аудару туралы өтiнiшi де атқарушылық iс жүргiзу материалдарына тiгiледi.

Жеке сот орындаушысымен ағымдағы
шоттағы сомаларды есепке алу
кiтабын (депозиттiк кiтап)
жүргiзу ережесiне қосымша

Нысан

Ағымдағы шоттағы соманы алу кiтабы (депозиттiк кiтап)