Қазақстан Республикасы Үкiметiнiң 2011 жылғы 14 қарашадағы № 1334 Қаулысы
Әлеуметтiк маңызы бар қызметтердiң өлшемдерiн бекiту туралы

«Әкiмшiлiк рәсiмдер туралы» Қазақстан Республикасының 2000 жылғы 27 қарашадағы Заңының 1-бабының 2-10-тармағына сәйкес Қазақстан Республикасының Үкiметi ҚАУЛЫ ЕТЕДI:
1. Қоса берiлiп отырған әлеуметтiк маңызы бар қызметтердiң өлшемдерi бекiтiлсiн.
2. Осы қаулы алғашқы ресми жарияланған күнiнен бастап күнтiзбелiк он күн өткен соң қолданысқа енгiзiледi.

Қазақстан Республикасының
Премьер-Министрi К. Мәсiмов

Қазақстан Республикасы
Үкiметiнiң
2011 жылғы 14 қарашадағы
№ 1334 қаулысымен
бекiтiлген

Әлеуметтiк маңызы бар қызметтердiң өлшемдерi

1. Жалпы ережелер

1. Осы әлеуметтiк маңызы бар қызметтердiң өлшемдерi (бұдан әрi – Өлшемдер) «Әкiмшiлiк рәсiмдер туралы» Қазақстан Республикасының 2000 жылғы 27 қарашадағы Заңына сәйкес мемлекеттiк қызметтердi әлеуметтiк маңызы бар қызметтерге жатқызу үшiн әзiрленген.
2. Осы Өлшемдерде мынадай ұғымдар пайдаланылады:
1) әлеуметтiк маңызы бар қызмет – жеке және (немесе) заңды тұлғалардың әлеуметтiк-экономикалық құқықтарын қамтамасыз етуге бағытталған мемлекеттiк қызмет көрсету;
2) есептi кезең – 1 қаңтардан 31 желтоқсанға дейiнгi күнтiзбелiк жыл.
3. Мемлекеттiк қызмет сапалық және сандық өлшемдерге сәйкес келген жағдайда әлеуметтiк маңызы бар қызмет болып танылады.

2. Сапалық өлшем

4. Әлеуметтiк маңызы бар қызметтердiң сапалық өлшемi мынадай салалардың бiрiнде мемлекеттiк қызмет көрсету болып табылады:
1) Қазақстан Республикасының халқын әлеуметтiк қамсыздандыру, қызмет көрсету және қорғау;
2) Қазақстан Республикасының халқын жұмысқа орналастыру, жұмыспен қамту;
3) денсаулық сақтау;
4) бiлiм беру;
5) тұрғын үй қатынастары;
6) кәсiпкерлiк қызмет.

3. Сандық өлшем