Сайлау қорларын мемлекеттiк тiркеу жөнiндегi нұсқаулық
Қазақстан Республикасы Орталық сайлау комиссиясының 2010 жылғы 19 тамыздағы № 7/8 қаулысымен бекiтiлген

Қазақстан Республикасы
Орталық сайлау комиссиясының
2010 жылғы 19 тамыздағы
№ 7/8 қаулысымен бекiтiлген

Сайлау қорларын мемлекеттiк тiркеу жөнiндегi нұсқаулық

1. Осы Нұсқаулық «Қазақстан Республикасындағы сайлау туралы» Қазақстан Республикасының 1995 жылғы 28 қыркүйектегi Конституциялық заңының 12 және 34-баптарына, Қазақстан Республикасы Президентiнiң 1996 жылғы 11 қарашадағы № 3205 Жарлығымен бекiтiлген Қазақстан Республикасы Орталық сайлау комиссиясы туралы ереженiң 9-тармағына сәйкес әзiрленген, және Президенттiкке кандидаттардың, партиялық тiзiмдерiн ұсынған саяси партиялардың, Қазақстан Республикасы Парламентi Сенатының және мәслихаттарының депутаттығына кандидаттардың сайлау қорларын мемлекеттiк тiркеу сұрақтары бойынша заңнаманың қолданылуын нақтылайды.
2. Президенттiкке кандидаттардың, партиялық тiзiмдерiн ұсынған саяси партиялардың сайлау қорларын Қазақстан Республикасы Орталық сайлау комиссиясы тiркейдi.
Парламент Сенатының депутаттығына кандидаттардың сайлау қорларын тиiстi облыстық, Астана және Алматы қалалық сайлау комиссиялары тiркейдi.
Мәслихаттардың депутаттығына кандидаттардың сайлау қорларын тиiстi округтiк сайлау комиссиялары тiркейдi.
3. Кандидаттардың, саяси партиялардың сайлау қорларын тiркеудi тиiстi сайлау комиссиялары кандидат, саяси партияның уәкiлеттi өкiлi сайлау комиссиясына жазбаша өтiнiш жасаған күнiнен бастап бiр күнтiзбелiк күннiң iшiнде жүргiзедi, ол туралы Сайлау қорларының тiзiлiмiнде жазба жасалады.
4. Орталық, облыстық, Астана және Алматы қалалық, округтiк сайлау комиссиялары Сайлау қорларының тiзiлiмiн осы Нұсқаулыққа қосымшаға сай нысан бойынша жүргiзедi.
5. Орталық, облыстық, Астана және Алматы қалалық, округтiк сайлау комиссиялары кандидаттың, саяси партияның уәкiлеттi өкiлiнiң өтiнiшi негiзiнде:
Сайлау қорларының тiзiлiмiне сайлау қоры туралы деректердi енгiзедi;
банк мекемесiнде кандидаттың, саяси партияның сайлау қорының арнаулы уақытша шотын ашады.
6. Сайлау қорларының қызметiн тоқтату тиiстi сайлау комиссиясының немесе соттың шешiмi негiзiнде жүзеге асырылады, ол туралы Сайлау қорларының тiзiлiмiнде жазба жасалады.
7. Сайлау қоры өз қызметiн:
«Қазақстан Республикасындағы сайлау туралы» Қазақстан Республикасының Конституциялық заңына сәйкес кандидатты, партиялық тiзiмдi тiркеу туралы шешiмнiң күшi жойылған жағдайда;
«Қазақстан Республикасындағы сайлау туралы» Қазақстан Республикасы Конституциялық заңының 34-бабы 9-тармағына сәйкес кандидаттың, саяси партияның сайлау қорлары қаражатын жұмсауы туралы есебiн қабылдау туралы тиiстi сайлау комиссиясының шешiмi бойынша;
«Қазақстан Республикасындағы сайлау туралы» Қазақстан Республикасының Конституциялық заңына сәйкес сайлау жарамсыз деп танылған жағдайда;
сот шешiмi бойынша тоқтатады.
8. Кандидатты, партиялық тiзiмдi тiркеудiң күшiн жою туралы шешiм бойынша сотқа не жоғары тұрған сайлау комиссиясына шағым жасалған жағдайда, сайлау қорларының қолданысын тоқтатуды тiркеу шешiм қабылданғанға дейiн тоқтатыла тұрады.

Сайлау қорларын мемлекеттiк
тiркеу жөнiндегi нұсқаулыққа
қосымша

Нысан

Сайлау қорларының тiзiлiмi